港聞

港聞二

【Emily】劉卓裕post「成長片段」 曬林憶蓮合照

【明報專訊】立法會選舉12月舉行,提名期今個月30號展開,非建制派荃灣區議員劉卓裕(卓卓)盛傳有意出戰直選,早前仲跨區去埋葵青擺街站,佢前日喺facebook上載自己「成長片段」,畀大家認識各個階段嘅佢,由BB、讀聖方濟中學嘅青澀少年樣,到投身職場做公關,大曬同天后林憶蓮、型男吳彥祖合照,以至同爸爸旅行、玩跳傘,參加區議會選舉,服務社區等相片,一一都盡錄片中。

盛傳想出戰立會直選

佢個fb小編話,劉卓裕喺葵青長大、荃灣讀書,片中係收集咗卓卓幾個覺得自己最「迷人」一面,問大家又認唔認到各個階段嘅卓卓。

另外,立法會選舉常客、西貢區議員方國珊噚日趁重陽節,喺將軍澳華人永遠墳場附近派物資,睇佢facebook亦都有上酒樓,同茶客打招呼。

方國珊同Emily講,佢做咗13年地區工作,每年清明、重陽都會到將軍澳華人永遠墳場附近同大家碰面,噚日亦都有帶信息反對政府將水泥廠設喺將軍澳。至於今次有冇興趣參選立法會,佢話為時尚早,先做好本分,但知道「完善選舉制度」後入閘方式唔同咗,佢冇信心拎到選委五大界別提名。

相關字詞﹕立法會選舉 方國珊 劉卓裕

上 / 下一篇新聞