港聞

港聞二

【Emily】上周遭DQ區議員資格 黎梓恩變「拳王」 搏擊賽攞盃

【明報專訊】沙田前區議員黎梓恩上周因宣誓無效而被DQ(取消)議席,睇佢平時文質彬彬,原來有打拳習慣。話說佢噚日參加「搏擊專業大賽」,除咗睇得出身形好fit,佢仲贏咗個獎盃返嚟,沙田前區議員陳兆陽話佢正式改名做「拳王恩」𠻹呀。黎梓恩接受Emily查詢時就謙虛笑住話,個比賽都係業餘級別、唔係專業級,佢贏咗嗰場賽事就有獎盃,又笑言要做拳王「百倍、千倍努力都唔止」,邊有咁易做拳王喎!

黎梓恩憶述自己3年前開始打拳,都係當做吓運動,直至近半年想挑戰吓自己,就操練去打比賽,每朝開會或者返辦事處工作前會跑吓步先,夜晚再操拳。

勤操練因唔想「全世界睇住畀人打」

黎梓恩話打拳之後健康咗,生活習慣、控制飲食都好咗,笑言有時都會覺得好攰,想「偷雞」,因為每周可能有4至5日要跑步、操練,「但唔得,偷咗雞,上台咪畀人打,寧願台下辛苦啲,如果唔係就全世界睇住你畀人打」。

相關字詞﹕區議員

上 / 下一篇新聞