港聞

港聞二

【Emily】打風去巡區 李梓敬開live「招風雨」

【明報專訊】「圓規」襲港,部分地區水浸,多名政界中人過去兩日都去咗巡區,睇吓區內有冇損毁需要跟進。民主黨曾自鳴即使唔再係油尖旺區議員,前日都特登去番大角嘴區,觀察區內情况。曾自鳴話雖然換咗個身分,但依然擔心街坊,希望大家喺打風期間一切安好。

曾自鳴「重返」大角嘴

沙田部分地區水浸情况嚴重,有隧道浸到有市民去游水,新民黨李梓敬、潘國山噚日下晝趁風勢減弱,去到沙田城門河一帶巡區,仲開埋live,但突然落起大雨,於是就喺橫風橫雨下同網民直播,一度略顯狼狽,遮都吹至變形。李梓敬話一做直播就大風,「觀衆貴人招風雨」。

油尖旺區議會前副主席余德寶噚日喺打風後巡區,形容係一種習慣,話區內大致平靜,叫有需要嘅街坊可以聯絡佢,佢有小量食物可以畀大家。

相關字詞﹕區議員 颱風 圓規

上 / 下一篇新聞