港聞

港聞二

【Emily】戰友獄中度25歲 送生日祝福 冠聰憂「害咗」之鋒

【明報專訊】前香港眾志秘書長黃之鋒正喺獄中服刑,佢噚日25歲生日,通過facebook話收到來信祝福,感激大家嘅每字每句,「我想在囚的人不論背景身分,也會格外想被記着,希望人們會念及目前承受這一切的自己」。今年生日,之鋒希望自己成為「更有成長的人,所記掛與思念的,有天得以重逢,再相見」。

黃之鋒:在囚者格外想被記着

之鋒憶述往年生日,18歲適逢2014年雨傘運動,喺金鐘夏慤道馬路唱生日歌;21歲時因衝擊「公民廣場」(政總東翼前地)案被判囚,首度喺監房過生日;到24歲生日,佢正思索香港嘅形勢有幾惡劣,朋友突然端上蛋糕提前為佢慶生,「記得品嚐那蛋糕時悲喜交集,淚水在眼眶打轉」。

流亡海外嘅前香港眾志創黨主席羅冠聰越洋祝福之鋒,喺fb直言發文前有諗過隔住半個地球講「生日快樂」,「會唔會被視為害左(咗)你(之鋒)嘅一步」。阿聰話政權可以瓦解人與人之間嘅物理距離,但精神上「我哋永遠都連埋一齊」。

文中寫道,香港可以有好多個羅冠聰,因為佢太過平凡,但唔會再有另一個黃之鋒,「你鋒芒畢露,但又有好多野(嘢)需要人扶持,先至係最獨特嘅存在」。

相關字詞﹕生日 羅冠聰 黃之鋒 香港眾志

上 / 下一篇新聞