港聞

港聞二

【Emily】侯志強願開區會 話要同羅庭德對質

【明報專訊】Emily噚日寫過,北區區議員侯志強(圖)以唔認可「港獨人士擔當北區區議會主席」為由,聲稱會採取不合作態度、流會以示不滿。噚日商台搵嚟北區區議會主席羅庭德同侯志強對談,羅庭德強調自己係愛國者,反而提醒鄉事派、建制派議員要以人民利益為依歸,先至係負責任嘅從政者。最終侯志強都有出席區議會會議。

羅庭德噚日喺商台節目《在晴朗的一天出發》提到,對於侯志強佢哋要用「威迫手段」導致議會癱瘓,表示遺憾但尊重。佢又話只要大家上網查吓「羅庭德、侯志強」,可以見到兩人都有合照,又話當選後都有同侯志強交流區政心得,「如果話我係港獨人士、對社區冇承擔嘅心,點解有傾有講?」

羅上載合照 稱向有交流區政心得

侯志強就話,羅庭德喺區議會上講過「光時」口號,其後又宣誓會愛國愛港,「係咪騙子?」佢話本身都諗住流會,但因為羅庭德半夜發聲明回應,「我當然要喺會上同佢對質,好多嘢講㗎」。

羅庭德其後喺facebook出帖,話高興經勸喻後,侯志強等一眾區議員「回頭是岸」開會,佢又上載同侯志強、港大法律學院前教授戴耀廷嘅合照,憶述當年一齊上戴耀廷節目做訪問,話侯志強嘅發言令人唏噓。

相關字詞﹕侯志強 羅庭德 區議會

上 / 下一篇新聞