港聞

港聞二

【Emily】護腿秘訣靠防曬 葉劉話用法國貨

【明報專訊】現年71歲嘅行政會議成員、新民黨主席葉劉淑儀一向獲讚保養得宜,民主思路嘅網台「竹石台」噚日邀請葉太做節目,由佢分享保養美腿心得;葉太自謙對腳「其實一啲都唔修長」,「(KOL)蕭若元講得啱,我係屬於矮,對腳無可能係修長」。被問點樣保持白滑肌膚,葉太提醒大家唔好暴曬,做戶外活動時要搽防曬,仲透露自己用開法國牌子。

節目主持、民主思路社區幹事姚潔凝話,羡慕葉太有美腿、皮膚又靚,佢同Emily講事前當然有夾過提問。葉太喺節目回應話自己鍾意行山,特別健身室曾因疫情關閉,所以一到周末會去山上行吓。至於日常飲食,葉太透露佢嘅媽媽、阿姨都患腸癌,令自己有擔心,所以𠵱家早餐會食穀物片、士多啤梨,「我雖然都好為食,但都盡量食多啲生果、蔬菜」。

葉太有個約30歲嘅女,佢話自己早年工作繁忙,冇太多親子時間,當時囡囡性格較反叛,成績一般,所以決定兩人一齊到美國讀書。讀書時嗰3年佢哋部分就讀嘅科目相同,亦多咗時間相處,所以變成好朋友。

相關字詞﹕美容 葉劉淑儀 民主思路

上 / 下一篇新聞