港聞

港聞二

【Emily】提畀掌聲港台無人應 葛珮帆「孤掌」表揚

【明報專訊】立法會資訊科技及廣播事務委員會噚日開會講《施政報告》相關政策,廣播處長李百全都在席,多名議員藉機讚香港電台,好似新民黨主席葉劉淑儀就話李百全上任後「人人都讚佢」,掃除所有歪風。民建聯葛珮帆都話要表揚港台近日做得好好,要畀啲掌聲港台,點知個會議室就無人和應而靜晒,委員會主席何君堯話「我真係聽唔到掌聲喎」,葛珮帆自己拍掌,再畀多隻手指公,何君堯就話「OK,Good!差唔多」。

葉太形容,李百全處理港台事務「一夫當關」,仲話政府架構重組最緊要搵啱人,唔好以為增加職位同人手就解決到問題,要搵多幾個「李百全」。自由黨邵家輝都喺會上讚港台節目,「近排睇落舒服好多」。

商務及經濟發展局長邱騰華話,港台管理層改變有不同局面,但港台《約章》寫明,港台作為政府部門及公共廣播機構嘅角色不變;當局亦用半年時間檢討港台制度,特別係編輯流程以及個案處理方面。

相關字詞﹕何君堯 葛珮帆 港台 李百全

上 / 下一篇新聞