港聞

港聞二

【Emily】稱北區主席羅庭德「港獨」 侯志强預告區會搞不合作運動

【明報專訊】北區區議會宣誓後,有11個議員過關,包括主席、非建制派羅庭德。作為當然議員嘅上水區鄉事委員會侯志強噚日發出新聞稿預告,今日會喺區議會大會上聯同另外3個鄉事派當然議員、3個建制派,一致決定唔跟隨(唔認可)「港獨人士擔當北區區議會主席」,及譴責大會主席,仲話會採取不合作態度,以流會行動表示不滿。

北區建制派宣誓前已狙擊羅庭德,話佢發表過「光復香港,時代革命」言論。羅庭德回覆Emily話,希望各位議員回頭是岸,強調佢係喺國安公署信納、民政事務局長徐英偉監誓下,同侯志強等人一同成為官方認可嘅愛國者。

指自己已過宣誓屬愛國者

羅庭德:流會違完善選舉初心

羅庭德又話,今次會議係倡議當局從大灣區內地城市覓地,新界原居民北上建丁屋興業發展,以彰顯中港一心,共建大灣區嘅決心。佢揶揄「愛國者本應同心同德,融入國家發展大方針」,但侯志強竟然喺呢個時候誹謗佢,搗亂得來不易嘅愛國者治港格局,亦有藐視港府同造反之嫌。

佢又提到,「對部分議員以激進手段表達政治訴求,使用脅迫手段,導致區議會流會癱瘓,走向『政治化』,與『完善選舉制度』的初心背道而馳,感到遺憾」,提醒議員連續4個月缺席會議將會喪失擔任議員嘅資格。

相關字詞﹕侯志強 羅庭德 北區區議會

上 / 下一篇新聞