港聞

港聞二

【Emily】林卓廷獄中書談6點意外收穫

【明報專訊】民主派35+初選案被告、民主黨林卓廷已還押超過半年,噚日佢立法會前同事張超雄喺YouTube讀出阿廷嘅獄中書,阿廷話痛失同家人相處時間令佢傷感無奈,但亦有6點意外收穫,包括同囚友之間嘅難得交往,令佢知道更多街頭智慧、犯案心理、刀光劍影同利益交易,佢亦說服咗5名囚友努力改過自身,形容每每論及家人嘅煎熬,都會頑石點頭。

「一夕之間,孩子已不再是孩子」

阿廷講到自己家人,特別係孩子喺佢入獄後更成熟懂事,「一夕之間,孩子已不再是孩子」,仔女感到家庭巨變、現實殘酷,佢哋知道對媽媽、家人要付更大責任、互相扶持、渡過困境;自己陷獄無令孩子灰心喪志,反而激起佢哋鬥心,鍛煉意志。

阿廷話自幼愛讀書,但人漸長俗務纏身,入獄後難得清靜,已讀咗近20本佳作,涉獵歷史、文學、宗教、科學等;佢亦有鍛煉體魄,入獄後腰背鍛煉更密集,呢幾個月食「私飯」,加上有系統操練,體重回升之餘,肌肉量明顯增加,現時站立彎腰,十指已能掂地,笑言「彎腰雙掌掂地的偉大復興夢,必定能在第二個半年計劃內提早勝利完成」。

其餘兩個收穫係:令自己更認識自己,同埋感受到各方好友對佢及其家人嘅厚愛。

相關字詞﹕民主派初選 林卓廷

上 / 下一篇新聞