港聞

港聞二

【Emily】談中大學生會解散話遺憾 兩舊生局長遺憾「會方作為」

【明報專訊】有半世紀歷史嘅中文大學學生會前日宣布解散,唔少人都好唏噓。保安局長鄧炳強同政制及內地事務局長曾國衞都係中大畢業生,佢哋噚日喺施政報告記者會被問到點睇中大學生會解散,兩位局長異口同聲話遺憾,不過唔係對學生會解散感遺憾,而係對於學生會嘅作為覺得遺憾,其中曾國衞講得直白,話「過去我哋喺中大,都唔係咁樣」。

鄧炳強喺1987年中大社工系畢業,佢話對於中大學生會嘅「取消」「有啲傷感」。對於校方要求學生會獨立註冊,佢認為「如果作為一個組織,連根據法例登記,呢個合法手續、應負責任都唔去負,其實我都有啲遺憾」。

曾國衞:過去我哋喺中大唔係咁

1986年喺中大新聞系畢業嘅曾國衞就話,近年睇到中大情况,「特別係學生會好多倒行逆施嘅情况」,佢深表遺憾。對於學生會解散,佢覺得「有啲可惜」,但就認為學生會「未能發揮佢應有維護學生、中大校友嗰啲權益,同時應該正確畀佢哋知道,應該點樣去為國家、為香港好,過去我哋喺中大,都唔係咁樣」。

中大校方今年2月同學生會「割席」,要求學生會獨立註冊,限期本月底屆滿。學生會前日發聲明話陷入註冊與否嘅兩難,上個月學生會聯席會議接納學生會代表會總辭、解散學生會嘅議案。

上 / 下一篇新聞