港聞

港聞二

【Emily】林鄭話後生「住劏房為私隱」 顏汶羽:冇人想住籠屋 青年都唔想

【明報專訊】港澳辦主任夏寶龍7月話期盼香港告別劏房同籠屋,特首林鄭月娥前晚出席《施政報告》傳媒論壇就被問到2049年做唔做到,佢話睇過啲劏房冇咩問題、單位好大,有啲後生仔鍾意多啲私隱就去住。青年民建聯總監顏汶羽喺facebook話「青年也不會想住劏房」,認為政府係要加快推行青年宿舍,而唔係要青年住劏房捱貴租。

顏汶羽話,實際上冇人會想喺籠屋劏房居住,青年肯定都唔想。佢話中聯辦多次落區,基層市民住屋問題係中央最關心嘅香港民生課題,佢認為政府要了解點解底層市民、基層青年要住劏房嘅根本原因,點樣喺短時間內破局。

斥政府轉移視線 籲勿合理化

佢話青年尋求獨立生活空間,讀大學時可以住宿舍,但畢業後要同番父母居住,未必係理想選擇,亦係林太所講嘅私隱問題;而另一方面,啱啱畢業嘅青年收入唔高,難負擔高昂屋租,先要被迫住劏房。佢又話,作為政府要思考嘅係點解青年收入持續偏低,亦要檢討已推行十幾年嘅青年宿舍計劃,點解起得比過渡房屋仲慢。佢批評,「這是政府的決心和執行力的問題,不應將問題轉移視線,更不能將問題合理化」。

相關字詞﹕顏汶羽 青年 劏房 林鄭月娥

上 / 下一篇新聞