港聞

港聞二

【Emily】施政報告答問會 談政治全面收緊 謝偉俊:好多市民想躺平

【明報專訊】特首林鄭月娥噚日去立法會出席答問會,唔少議員盛讚《施政報告》,一片歌頌聲與掌聲下,建制派謝偉俊(Paul)就提及政治壓力,「我哋𠵱家政治上係全方位收緊、收窄,好多市民覺得需要『躺平』一下,但(政府)喺經濟民生上畀多啲個人自由、空間係非常重要,可以(令市民)消消氣」,建議放寬強積金嘅限制。

促經濟民生畀多啲個人自由

Emily事後問番阿Paul,佢話只係反映民意,「你唔覺得社會上嘅氛圍令大家唔舒服?移民也好,壓力感也好,無論咩陣營都覺得社會比較繃緊」。會否擔心林太聽完唔高興?阿Paul講笑話「佢成日都唔高興㗎啦」,又話議員有時候要講啲官員唔鍾意聽嘅說話。

保險界議員陳健波(波哥)就炮轟政府官員中文水平低,話有市民反映,政府嘅中文版文件行文有問題,寫得長氣,英文版反而更易理解。

官員被轟中文差

林鄭:我成日叫佢哋睇書㗎

林太即場承認不足,話唯有官員各自努力,「我哋各個都一把年紀,叫佢哋重新學習(中文)有難度」,仲望向坐喺台下嘅問責官員,「我成日都鼓勵佢哋睇書㗎」。林太話公務員中譯英嘅能力唔夠,點名公務員事務局長聶德權「要加埋學習中文喺培訓內容」。

相關字詞﹕立法會 特首林鄭月娥 施政報告

上 / 下一篇新聞