港聞

港聞二

【Emily】巴士落廣告 劉國勳搶閘sell新界北

【明報專訊】特首林鄭月娥任內最後一份《施政報告》提出多項重大政策遠景,當中以發展「北部都會區」成最大重點,民建聯立法會議員劉國勳過去一段日子都提倡發展新界北,噚日佢就喺facebook連出多post「成功爭取」,朝早林太未宣讀施政報告,佢就貼出原來佢已喺九巴車身賣廣告,宣傳「新界北建設香港新中心」嘅倡議。

連發多post 自詡成功爭取

喺林太公布北部都會區發展後,劉國勳立即喺fb話「謝謝特首全數採取新界北建設香港新中心倡議書作施政報告」,難怪佢同Emily講呢份施政報告喺方向上係100分,但仲要睇點樣執行等。

何君堯笑言或有公廁專員

不過就唔係所有議員都對施政報告拍手掌,建制派何君堯點評報告時,就提到政府有意增設不同「專員」、避免政出多門,包括冀設兒童事務專員、海濱事務專員等,佢就笑言或者將來好多廁所、要專人打理,「公廁專員都有,按邏輯理解,會做得到位啲」。何君堯又話林太噚日「好感性」,認為「黑暴」導致佢好大壓力,佩服對方咬緊牙關,「作為女士,佢犧牲好大,家庭畀佢支持唔少先克服到」。

相關字詞﹕何君堯 新界北發展 劉國勳

上 / 下一篇新聞