港聞

港聞二

【Emily】《施政》無提暫停區會撥款權 林鄭:唔係大政策

【明報專訊】立法會民政事務委員會下周一將討論「修訂社區參與計劃及地區小型工程計劃的推行安排」,政府噚日向立法會交文件話會暫停現屆區議會提出、通過上述撥款項目,改由民政總署、民政處或康文署喺參考地區意見後,提議項目。特首林鄭月娥噚日喺記者會被問到點解「唔光明正大」寫埋喺《施政報告》,佢反駁唔存在咩「光明正大定係陰陰濕濕」,施政報告成3萬字,佢讀到索晒氣,唔可能每一樣嘢都放入去,而且呢個唔係大政策,只係呢一屆暫停。

「有區會得3人 決定撥款公道否?」

林太話,呢屆區議會好多人唔符合愛國愛港,政府已尊重區議會體制,暫時冇話要縮短呢屆會期,但可以想像區議會內有十幾個選區,但有區議會目前只得3個人,其他區無代表。佢反問,由呢3個人決定小型工程撥款係咪公道,認為咁係唔民主嘅做法。佢形容,民政局做到第三批區議員宣誓,睇到區議會殘缺不全,故負責任咁提出解決方法。

佢又話,區議會或地方行政嘅未來要慢慢研究,施政報告冇講《基本法》97條區議會嘅職能,重申區議會從來無權,只係諮詢組織,政府之後畀撥款佢分配係出於尊重。

相關字詞﹕民政事務局 林鄭月娥 宣誓 區議會撥款 區議會

上 / 下一篇新聞