港聞

港聞二

【Emily】唔少建制閉目養神 聽施政報告 鄧炳強派喉糖

【明報專訊】特首林鄭月娥噚日宣讀任內最後一份《施政報告》,讀咗足足兩個幾鐘,唔少建制派議員都被傳媒影到閉目養神。保安局長鄧炳強就有備而來,帶埋喉糖「漁夫之寶」到場,佢無「自私食」,喺林太入場前幾分鐘,佢已經同教育局長楊潤雄、政制及內地事務局長曾國衞「開心share」,Emily就見到楊潤雄搵張紙兜住3粒「漁夫之寶」喉糖,塞落自己口袋。

陳茂波專心聽 林兆波撐老婆

噚日多名官員都去立法會,其間同一班議員傾吓偈,不過Emily見到,財政司長陳茂波一到場就留喺自己個位,冇行去同議員交流;後來經民聯張華峰主動行去佢個位搵佢傾偈。陳茂波喺林太發言期間專心聆聽,會後強調要確保審慎理財、應使則使嘅原則,不過冇答提問就離開。

林太發言尾聲哽咽,提到家人無限信任、默默支持係支撐佢嘅動力之一。林太老公林兆波噚日亦到立法會撐太太場;不過有傳媒就影到佢閉目養神。Emily見到行政會議召集人陳智思一見到佢就熱情同佢傾偈,又拍佢膊頭;林兆波就不時拎手巾仔抹手,睇落相當緊張。Emily會後問佢會唔會支持太太連任、點睇林太發言時哽咽,佢未有回應就走咗。

相關字詞﹕楊潤雄 陳茂波 施政報告 立法會

上 / 下一篇新聞