港聞

港聞二

【Emily】議辦遭淋油 曾錦榮:或用嚟二創藝術品

【明報專訊】新界西區議員周五要宣誓,其中屯門區議員曾錦榮嘅辦事處噚日凌晨被淋紅油,佢話已經報警,但喺facebook發文話,與其快快手清潔污漬,不如保留等自己被DQ(取消資格)後,用嚟創作一幅藝術品;仲揶揄話如果疑犯想再潑,下次可以考慮更具藝術成分嘅塗鴉,到時候佢可能因為藝術理由,「保留閣下作品一段時間,希望閣下可為本地創作作出一份貢獻」。

究竟咩事被潑紅油?曾錦榮話同「欠債還錢」無關,佢仲交得起租金、出得起人工,但同Emily講,估計係先前打擊違泊同人結怨,又或者因為政治原因。辦事處閉路電視影到疑犯個樣,曾錦榮嚴厲譴責有關行為,話職員因而要加班清潔,一張靚地氈亦遭損壞;但佢同Emily講,日後會繼續做「應該要做且可能得罪人嘅工作」。

相關字詞﹕區議員 曾錦榮 區議員宣誓

上 / 下一篇新聞