港聞

港聞二

【Emily】「小鐵漢」肺炎好轉 姑娘讚乖識講早晨

【明報專訊】患先天心臟病嘅4歲「小鐵漢」Kansas(圖),上周做完第三階段嘅單心室循環手術後,之後出現細菌感染引致肺炎,個肺有八成花晒,X光片影出來幾乎全白。佢媽咪噚日喺facebook公布好消息,話Kansas洗咗兩次肺之後,X光檢查最新顯示肺部影出來已經八成位置變番黑色,而且姑娘話Kansas比前幾日乖同合作,朝早有同姑娘講「早晨」。

Kansas媽咪話,阿仔原本個肺有八成花咗,醫生都認為要即刻治療,但係根據病情,洗肺係高風險,醫生已經盡力將風險降到最低,𠵱家Kansas已經唔使插喉幫助呼吸,醫院用氧氣令佢唞氣舒服啲,擴張肺部,物理治療師亦幫手為佢拍痰、抽痰。

媽咪又話前日嚴厲咁同阿仔講咗好多次,「要打低壞嘅菌,一定要聽話」,今日阿仔都好乖,例如同姑娘講早晨,探病時又有叫爸爸媽媽,又有叫媽咪拍patpat。原來醫院每日只係畀探病30分鐘,媽咪話前晚喺病房外面張梳化等咗成晚,形容係「短短嘅相聚,漫長整夜嘅分離」。除咗醫護,媽咪亦都感激好多人無間斷咁同Kansas集氣,令小鐵漢收到好多正能量。

上 / 下一篇新聞