港聞

港聞二

【Emily】綠領行動倡推租借可重用餐具

【明報專訊】疫情持續,唔少香港人成日叫外賣,製造好多即棄塑膠垃圾。環保團體綠領行動喺疫情初期估計過,本港每星期消耗超過1億件外賣即棄塑膠。佢哋近日建議政府唔單止要推動立法管制即棄膠餐具,亦要鼓勵市民自備可重用餐具,同時研究提供可重用餐具租借服務。

綠領行動話,政府雖有意立法管制即棄膠餐具,但最快要2025年先禁止食肆喺堂食範圍派發即棄膠餐具,「遠水難救近火」,認為要從根本解決都市固體廢物問題,政府應鼓勵市民習慣減少使用即棄餐具。

綠領行動總幹事何漢威話,除咗本港社企,新加坡、台灣等地都有租餐具嘅先例,來自新加坡嘅初創公司Muuse上年10月起同本港地產商合作,喺鰂魚涌提供可重用環保杯租借服務,可見香港只差法例配合呢個「東風」。綠領行動仲建議政府以投標方式引入餐盒租借服務供應商、喺18區或食肆較密集嘅地區,引入餐盒租借服務供應商,利用手機程式為餐飲業同市民提供可重用餐具租借服務。佢哋又建議政府建立完整嘅清洗同運輸物流供應鏈,長遠立法禁止即棄外賣餐具。

相關字詞﹕租借服務 餐具 綠領行動

上 / 下一篇新聞