港聞

港聞二

【Emily】民記送「人才」滬政府見習學管治

【明報專訊】民建聯早排搞咗一系列計劃培訓及提供人才,包括「政道」課程,仲有透過「賢路」以唔同評核甄選德才兼備嘅人進入人才庫,人才庫喺8月搞咗個「私塾」讀書會,請咗3個資深學者同人才庫成員做導修,希望成員靜靜閱讀、思考,從而提煉出對新形勢嘅論述。民建聯刊物《建‧聞》透露,下年會搞「善治」計劃鍛煉人才,獲甄選嘅民記年輕成員可到上海政府單位見習,包括約兩周學習和約兩個月實地訓練,學習國家地區治理經驗。

計劃取名「善治」 兩月實地訓練

「善治」計劃主辦機構包括香港再出發大聯盟、全國政協港澳台僑委員會、香港中聯辦、上海市政協港區省級政協聯誼會。至於「私塾」,《建‧聞》介紹學習內容除咗《論語》、《史記》、《資治通鑑》、《貞觀政要》外,亦包括中國百年奮鬥史、一帶一路、和平崛起、近代民主思潮及危機等重要課題。

據了解,帶住人才庫成員導修嘅學者包括出版人陳萬雄,主講題目係「歷史與政治之間:古今的對話」;中大香港亞太研究所名譽研究員雷競璇主講「中國歷史與政治」;原中央政策組全職顧問王卓祺就主講「民主的前世今生:理念、制度變更及未來展望」。

相關字詞﹕培訓人才 民建聯

上 / 下一篇新聞