港聞

港聞二

【Emily】公民黨陳珮明 辭沙田區議員

【明報專訊】新界東(北區、沙田、大埔、西貢)4個區議會嘅區議員今日宣誓。繼陳諾恒後,公民黨陳珮明亦辭任沙田區議員,前日(2日)生效。陳珮明喺facebook回顧任內工作,話早已決定喺宣誓前一兩日辭職,「只是港共連月放風,未有行動,當然八風不動」。佢又話:「港共橫加宣誓要求,乃輸打贏要,旨在推翻二零一九年區議會選舉結果,順道找些借口把議員刁難一番再DQ,唔睬佢。」

「港共盼社會碎片化

我們要維持與人關係」

佢話多謝助理、同事、義工、親友、街坊一直襄助,自己一直未租到寫字樓,區內唯一嘅商場索租甚高,屋邨又冇位,雖然有幸得街坊包容體諒,但可惜好多活動如電影會等都難以舉行,唯一好處係離任後唔使處理太多物資同雜務。

佢話議會係一個工具,尚在手中應當善用,所以佢從未缺席區議會大大小小嘅會議。佢最後寄語:「港共對各個民間團體文攻武嚇,想把社會割成碎片,我們就更要與家人、朋友、社會上每一個人建立和維持關係。」

相關字詞﹕民政事務局 沙田區議會 區議員宣誓

上 / 下一篇新聞