港聞

港聞二

【Emily】買米探劏房戶 田北辰促租管訂起始金

【明報專訊】實政圓桌立法會議員田北辰噚日同黨友莊豪鋒、社區組織協會施麗珊一齊去荃灣探訪8個劏房戶,雖然街坊同佢講唔使帶禮物,但田二少話想盡小小心意,用咗新一期2000蚊電子消費券再加1000蚊,買咗8包10公斤米送禮,同埋買咗書券送畀小朋友,畀佢哋買鍾意嘅書同文具。

71歲嘅田二少仍然好壯健,噚日幫手托米行樓梯。佢話「食米要知米貴,住屋要知租貴」,同啲劏房戶傾偈了解佢哋嘅花費,有住戶用一半人工(3500元)交租,剩番一半就3個人使,話如果平500蚊租已經幫到唔少。田二少話好多租戶平時一日三餐都係自己煮,所以送米夠實際,而更實際係政策點樣幫到佢哋。佢話好多劏房戶𠵱家都未諗到推出租管後可能有業主加租,強調推租務管制一定要配合起始租金,否則形同虛設。

相關字詞﹕劏房租管 劏房 田北辰

上 / 下一篇新聞