港聞

港聞二

【Emily】「搵得嘅都係自己人,保證唔hard sell」 辭區議員 趙柱幫轉行做地產

【明報專訊】區議員宣誓先後導致大批民主派區議員辭職、被DQ,唔少人都有新去向。原本係沙田區議員嘅趙柱幫7月辭職,佢噚日透露轉行做地產代理,仲上載咗自己張牌照,叫大家如果要買樓賣樓、出租放租都可以搵佢,仲話相熟朋友佣金折扣一定畀到盡。佢話嚟緊會主打沙田區物業,包括馬鞍山、沙田、大圍、火炭一帶。不過,佢慨嘆自己一畢業就從事社福行業,「真心未完全習慣」,又話搵得佢嘅都係自己人,「保證唔會hard sell,從來唔鍾意勉強人」。

趙柱幫上月底曾經出post,提到新工作係經家人介紹,「係一份自己從來無做過嘅,亦都係以前自己比較抗拒嘅職業」;不過礙於7至8月要處理結束議員辦事處嘅手尾,唯有靠新工作嘅彈性工時同僅有底薪支撐。

DQ區議員梁翊婷物資送街坊

至於早前被裁定宣誓無效嘅觀塘前區議員梁翊婷,噚日就舉行「十一國慶大酬賓」,因為辦事處要結束,為感謝街坊一直支持,免費送出大量物資,根據佢上載嘅照片,分別送出口罩、桌上遊戲等,唔少街坊到場領取物品後,都同梁翊婷合照留念。

相關字詞﹕區議員辭職 區議員宣誓 民主派

上 / 下一篇新聞