港聞

港聞二

【Emily】工聯搞灣區服務社 教人用微信支付

【明報專訊】粵港澳大灣區係國家發展策略,工聯會𠵱家有6個內地諮詢服務中心,位於深圳、東莞、惠州等,工聯會理事長、全國政協委員黃國噚日同Emily講,正籌備將內地諮詢服務中心轉型升級為「大灣區服務社」,原本目標係今年成立,𠵱家做緊慈善團體註冊,未知幾時獲批。佢話內地諮詢服務中心以往一直接收好多求助個案,而籌備中嘅服務社就希望做多啲民生福利,例如設立長者服務中心等,亦會請社工提供服務。

黃國話𠵱家喺內地嘅港人主要係讀書、工作同退休,雖然港府一直推動港人融入大灣區發展,但係未返過內地嘅港人始終缺少相關資訊,將來服務社都希望做到一個窗口,介紹大灣區嘅情况,幫港人進入大灣區,例如要返內地退休嘅港人,服務社將會提供課程教用微信支付等。佢認為𠵱家嘅特區政府駐粵辦做商務工作比較多,民生就少啲。

黃國又提到,工聯會內地諮詢中心都有協助港人喺內地接種新冠疫苗、繼續送藥等,佢希望爭取「醫健通」可以喺內地跨境用。佢仲透露勞工界選委正草擬聯合政綱,睇下同立法會、特首參選人諗法係咪一致,再決定提名咩人。

相關字詞﹕大灣區 黃國 工聯會

上 / 下一篇新聞