港聞

港聞二

【Emily】李梓敬組KOL聯盟打「國際線」

【明報專訊】2019年反修例風波後,唔少人關注「國際線」,新民黨李梓敬、工聯會陳穎欣等人近日發起「《中國故事》KOL聯盟」,希望做好國際輿論工作,當中唔少人都開咗Twitter帳戶。李梓敬Twitter噚日暫時有6000多人追蹤,相比立法會前議員羅冠聰有28.7萬人追蹤,仍需努力。李梓敬都自言要喺Twitter追蹤者人數上「追落後」,佢哋另外都開咗YouTube英文頻道。

李梓敬稱聯盟亦會喺主流媒體輪流投稿,包括香港英文報章《南華早報》、《虎報》等,甚至話想上港台英文節目The Pulse(脈搏),不過早前有傳媒引消息話港台已經停播The Pulse喇。

籲全國杯葛麥記 被質疑刑恐後改post

另外,日前麥當勞因為用「唔搵佢,就會走返出嚟」宣傳餐廳優惠,引起建制派不滿,李梓敬話喺香港杯葛麥當勞冇用,「要佢哋跪低,大家快啲上微博通知內地網民,全國杯葛麥當勞」。但其實麥當勞係中信旗下,亦即中資機構;與此同時,有網民就重提之前有人因為呼籲抵制TVB及相關企業,涉刑事恐嚇被捕。李梓敬噚日就改post,由原先提出「全國杯葛」,修改為「要佢哋跪底,就要上微博通知內地網民,咁先有用」。

相關字詞﹕藍營 新民黨

上 / 下一篇新聞