港聞

港聞二

【Emily】《墮海唔好搵》下架 《落架唔好搵》上架

【明報專訊】高級督察林婉儀遺體日前喺大嶼山二澳尋回,立法會議員梁美芬喺facebook點名批評「高登音樂台」發布歌曲,將近日熱播歌曲《跌嘢唔好搵》改為《墮海唔好搵》,「做法令人齒冷」。高登音樂台其後將歌曲下架,又重新上載《落架唔好搵》(圖),不過有網民就將備份嘅《墮海唔好搵》重新上載。

《墮海唔好搵》歌詞包括「跌落海,試吓唔好搵」、「跌咗人落海,不如試吓唔好執」,令人引起聯想。高登音樂台就話,最近出咗首新歌,「旋即受強烈政治打壓」,深受困擾及精神受壓,故將影片下架。《落架唔好搵》嘅歌詞就包括「有冇聽過梁美芬嘅全城譴責」,仲不斷有人講「驚啦驚啦驚啦」。

梁美芬噚日就話,社交媒體有人就女警墮海一事作曲,好多留言內容令人齒冷,「不禁要問,法治文明嘅香港,點解會有咁嘅行為出現?」佢重提修例設「辱警罪」,仲話如有需要佢會私人修例、交畀政府跟進。Emily問過警方有冇調查高登音樂台,未獲回覆。

另外,元朗區議員張秀賢噚日就話,真係跌嘢唔好搵,但佢講嘅係自己議辦嘅事。佢上載閉路電視片段,見到有個男人入辦事處,逗留約一分鐘,離開時攞埋辦事處嘅營業牌走。

相關字詞﹕跌嘢唔好搵 梁美芬 區議員

上 / 下一篇新聞