港聞

港聞二

【Emily】機械人進駐長者中心 識報資訊講笑話

【明報專訊】近排一個名為「東仔」嘅語音互動機械人進駐東華三院方肇彝長者鄰舍中心,擔當溝通大使,佢唔止識得解答老友記提問,仲會提供長者中心活動資訊、匯報實時天氣狀况,又識得講笑話,𧨾到唔少老友記開心。

推動「積極老齡化」嘅理大賽馬會社會創新設計院,推出「長者中心再想像」共創項目,邀請上述中心同人工智能科技公司同本地設計公司合作設計呢個機械人。貌似太空人嘅「東仔」集多項功能於一身,有用家面容識別功能,可以發放預錄嘅長者中心活動資訊,又識得解答長者問題,問好時仲識得揮手。聽講用機械人協助溝通嘅主意係來自長者中心一位老友記桂蓮。

賽馬會社會創新設計院項目經理鄭依依話,考慮到老友記因為唔熟悉科技而產生嘅挫折感,喺設計中加入長者友善元素,提升產品嘅科技包容度,亦希望用人工智能技術協助長者中心傳遞資訊,分擔佢哋嘅工作。「東仔」會駐守中心一年,做用家測試,希望收集長者提問方式同行為模式嘅數據,再改進功能,令互動更有效。

相關字詞﹕理大 樂齡科技 長者

上 / 下一篇新聞