港聞

港聞二

【Emily】「綠水青山就是金山銀山」 白鴿黨借習言論反明日大嶼

【明報專訊】特首林鄭月娥下月6日發表《施政報告》,民主黨雖然已冇立法會議席,但噚日仍開記招提出多項政策建議。主席羅健熙話內地提到「環境權利」,又引述國家主席習近平講過「綠水青山就是金山銀山」,強調香港應該保護自然環境,停止發展明日大嶼、保留郊野公園用地,改以《收回土地條例》等方式發展土地。佢又話應該取消丁權。

引娥姐參選難攞提名

羅健熙促增市民參政空間

政制方面,羅健熙認為要落實《基本法》第45條及68條,即普選特首及立法會,又強調要加強市民參政空間。被問到點睇林太早前話「既然非建制派冇參選選委會、如何令佢哋當選」嘅言論,羅健熙就話一般人要參選都唔知點攞提名,佢以「娥姐」陳玉娥為例,以往娥姐經常參選,但今次都呻難攞提名,認為林太應思考點樣令市民容易啲參選。

民主黨深水埗區議員袁海文就話,新冠疫情下全球都講緊恢復經濟,認為香港長遠都要探討與病毒共存,應該先為此諮詢,又話應該放寬限聚措施,唔應該不合理剝奪市民集會、出入境等自由。

被問到今次會否係最後一份施政報告倡議,羅健熙強調希望繼續做,認為支持者對佢哋有期望,雖然喺現時政治環境下要小心啲,但亦要反映港人聲音同想法。

相關字詞﹕施政報告 民主黨 習近平

上 / 下一篇新聞