港聞

港聞二

【Emily】辛亥革命110年大會 中聯辦羅永綱露面

【明報專訊】國務院7月底宣布,澳門中聯辦副主任羅永綱調任香港中聯辦副主任。羅永綱上任近兩個月,噚日首次喺公開場合亮相(圖)。佢出席「香港各界紀念辛亥革命110周年大會」並致辭,佢話弘揚愛國主義精神,必須增進對當代中國嘅認識,進一步加強國家認同,呼籲廣大香港同胞特別係青年,要加深對國家歷史文化嘅了解,亦要加強對當代國情國策嘅認識。

話弘揚愛國主義須堅持愛國者治港

羅永綱仲話,弘揚愛國主義精神,必須堅持「愛國者治港」,將香港治理好、發展好;而新選制下首次選委會選舉依法舉行,「愛國者治港」新格局逐步形成,包括新任選委在內嘅特區管治團隊會以「愛國若命」精神,守護「一國兩制」事業,以發展香港嘅實績為國家建設添彩等。

署理特首陳茂波喺同一活動話,香港回歸20多年,今日或許存在唔少問題及矛盾,但有國家支持同一國兩制優勢下,香港融入國家發展大局,捉緊國家發展機遇,會逐一化解矛盾。佢仲話,只要堅持愛國者治港,堅持以市民為本嘅政府治理,香港未來必定更璀璨耀眼,市民生活質素會進一步提升。

相關字詞﹕愛國者治港 陳茂波 羅永綱 辛亥革命

上 / 下一篇新聞