港聞

港聞二

【Emily】子女有目標 杜凱琹父母:相信最重要

【明報專訊】東京奧運乒乓女團銅牌得主之一杜凱琹(阿杜)偕父母接受教育局訪問,原來阿杜細個時家人安排佢學跳舞同彈琴,直至佢去睇阿哥練習乒乓波,即使只係去執波都好有興趣,後來更一試愛上。杜媽媽話每個人都有專長,建議家長平時多同小朋友傾偈、陪伴佢哋,喺生活細節上發掘子女潛能。

杜爸爸就話,阿女轉做全職運動員前經過全家討論,笑言「結果係內定」,佢點都會支持個女全職打波。佢話阿女做全職運動員後雖然冇咗校園生活,但喺奧運奪得銅牌呢個榮譽,係值得嘅。

阿杜嘅運動員之路唔係一帆風順,19歲時就遇上多場敗仗。杜媽媽話,當時阿女由青少年組轉打成人組,佢勉勵阿女經歷多幾次輸波就會迎來勝利。杜爸爸就話,如仔女已訂下目標,家人默默喺背後支持就可以,最重要相信、支持同鼓勵佢哋。

相關字詞﹕教育局 家長 乒乓球 杜凱琹

上 / 下一篇新聞