港聞

港聞二

【Emily】林太月餅送記者 葉劉又曬旗袍

【明報專訊】噚日中秋節,特首林鄭月娥見記者後,向在場傳媒派發美心流心奶皇月餅,附上一張印有卡通版林太嘅心意卡,印有「中秋節快樂」同林太簽名。林太噚日出席行政會議前見記者時,背景幕打出「月滿中秋 共慶佳節」字句 。

政界中人亦紛紛出文賀中秋,新民黨主席葉劉淑儀推出新一輯旗袍相,仲問網民:「我在杭州買的旗袍好看嗎?」葉太喺facebook帖文中,點名感謝財經專欄作者渾水送咗盒月餅畀佢,話味道唔錯,但就問點解月餅盒有佢個樣。葉太仲引詩「萬里無雲鏡九州,最團圓夜是中秋」賀中秋,佢話中秋代表家庭團圓,祝願各位家庭幸福之外,希望早日通關,等分隔兩地嘅家庭可以早日團聚。葉太上載旗袍相後,10小時內吸引近1900人畀like,不過有網民批評係「貴族生活式的炫耀」。

民建聯鄭泳舜亦上載咗張運動相,祝願各位中秋節快樂同時,問大家有冇食多咗月餅,「開心過後又係時候跑多幾圈」,提醒趁今日放假記得做吓運動,「運動是為了食得更多」。

相關字詞﹕旗袍 特首林鄭月娥 葉劉淑儀 中秋節

上 / 下一篇新聞