港聞

港聞二

【Emily】法律界選委候選人明晤大律師公會

【明報專訊】選委會選舉下周日(19日)舉行,一眾候選人近日馬不停蹄會見界別嘅團體選民,當中,15名法律界候選人聽日會同大律師公會代表會面。候選人之一嘅全國政協前常委、律師會前會長劉漢銓接受Emily查詢時就表示,會向對方介紹政綱、盡力爭取對方認同,即使有政治議題都會照講,「唔會見人講人話、見鬼講鬼話」。佢又笑言名單內有唔少資深大律師,律師會前會長都有兩個,其他候選人專業水平都高,有信心爭取對方支持。

劉漢銓話,大律師公會主席夏博義、副主席葉巧琦等人都會出席座談會;被問到大律師公會近年捲入政治風波,劉漢銓就認為,作為候選人有責任聆聽選民意見,佢亦相信大家喺維護司法獨立、法治精神等議題上都有共同意願。今次法律界有16人爭15席,包括劉漢銓嘅15人名單及律師白濤,所有候選人名單可以參考選舉事務處網頁。

相關字詞﹕選委會 法律界 選委會選舉 大律師公會

上 / 下一篇新聞