港聞

港聞二

【Emily】西九第三庭改裝重開 被告席可納50人

【明報專訊】西九龍法院第三庭改裝成大型法庭後,噚日(14日)首次重開聆訊,即時處理4名港大生涉違反《港區國安法》嘅提堂。司法機構話,第三庭係目前全港最大嘅刑事法庭,可以處理各級法院有多名被告嘅案件,被告席更擴充到可以容納50人。

呢個法庭喺今年4月至8月裝修,增加咗座位及提升功能,今年8月完工,立法會司法及法律事務委員會仲到訪西九龍法院大樓參觀。

𠵱家呢個庭嘅被告席已經加設三行座位,由原本只係坐到12人,增至坐到50人。律師席由18個位增至100個位,公眾席就設有50個位,亦有長枱畀記者用。

喺一個法庭內,同時容納到多個法律代表、被告家屬、傳媒同公眾,Emily諗,下次「35+初選案」47名被告喺下周四(23日)提堂,佢哋就唔使再迫到坐喺被告席外嘅長櫈,傳媒同家屬亦唔使再到延伸庭睇直播喇。

相關字詞﹕法庭 西九龍裁判法院 司法機構

上 / 下一篇新聞