港聞

港聞二

【Emily】5建制缺席 葵青區會選唔到副主席

【明報專訊】大批民主派區議員7月辭職,多區因而要補選正、副主席,但部分區都因為流會致未能舉行選舉。本身係葵青區議會副主席嘅張文龍早前辭職,原定噚日補選,但主席梁錦威因支聯會案還押,加上5名建制派缺席,最終因為人數不足而流會,未能選副主席。

缺席郭芙蓉:宣誓未確認 不應倉卒選

未有出席會議嘅民建聯郭芙蓉其後喺facebook發帖,為缺席會議解畫,話喺未能確認所有葵青區議員為「合資格愛國者身分」前提下,不應倉卒舉行副主席選舉。郭特意指出,梁錦威喺7月選舉區議會主席期間,曾公然表明支聯會「結束一黨專政」綱領,「在有違反國安法之嫌下,仍順利當選主席,惟擔任主席不足兩個月,就被警方拘捕調查」;佢認為政府必須盡快落實區議會宣誓安排,先至舉行區議會正、副主席選舉。噚日同樣缺席會議嘅民建聯盧婉婷、梁嘉銘,亦有轉載郭芙蓉嘅帖文。另屯門區議會噚日原定補選區議會主席,填補陳樹英辭職後嘅空缺,但喺建制、泛民同樣有區議員缺席下,會議再度流會。

相關字詞﹕宣誓 區議會 民建聯

上 / 下一篇新聞