港聞

港聞二

【Emily】「院友話好耐無食過」葵涌醫院整月餅過節

【明報專訊】下星期二就係中秋節,噚日葵涌醫院多個部門嘅主管伙拍膳食部員工,為精神科約300名院友炮製月餅(圖),將會喺中秋當日嘅午飯時間派畀佢哋,希望院內多啲節日氣氛。

有份落手製作月餅嘅行政事務總經理盧國銓話,疫情下家屬探訪限制多,「訪問過院友,佢哋話好耐無食過月餅」,首次製作月餅希望作為一番心意,令院友開心過節。

盧國銓話,佢哋整嘅月餅出面都未必買到,選用芥花籽油搓皮,配合白蓮蓉餡同約半個蛋黃,部分餡料以紫薯代替,糖尿病人都啱食,「我哋有營養師監督,以健康為主,無出面賣嘅咁甜同油」。佢又話試整過三四次,「一開始啲皮搓得唔靚、散晒,焗唔成,第一次仲要扔掉」,其間有同事上網研究食譜,靠不斷試食同改良而製成。

至於有吞嚥困難嘅院友,醫院話會買定啲布甸同糖水畀佢哋食,希望佢哋唔好失望。

上 / 下一篇新聞