港聞

港聞二

【Emily】吳志森移英 反駁林鄭「淒涼論」

【明報專訊】特首林鄭月娥日前話,聽到有啲移民故事「話去到都好淒涼」,港台節目《頭條新聞》前主持吳志森(太后)噚日發布影片,透露數月前已赴英國,又反駁林太話,「突然之間適應全新環境,總係會有啲困難,但我唔覺得自己好淒涼」。

「啲嘢返唔到轉頭,甚至你會發噩夢」

太后話去到外地可以逐步適應,但留喺香港見唔到前景,「見唔到有嘢改變,啲嘢返唔到轉頭,甚至你會發噩夢」,好多人都懷疑香港未必會變好。另一《頭條新聞》前主持曾志豪(小豪子)已赴台灣,佢同太后噚日喺網上一齊做節目,兩人都話好耐無見對方。太后話帶咗記錄2019年反修例示威嘅畫冊去英國,但有時翻睇時都覺得「不堪回首」,形容自己嘅精神無法離開香港。

李軒朗赴台攻讀碩士

另外,5月宣布離港嘅九龍城前區議員李軒朗,噚日喺facebook透露已抵達台灣,未來一年會喺國立中山大學政治學研究所就讀碩士課程。李軒朗話過去數月嘅離散生活,令佢深刻了解到流亡港人喺外地面對嘅各種艱苦同煎熬。

李軒朗去年曾與時任元朗區議員王百羽合組名單,報名參加立法會選舉,選舉最終押後,兩人因選舉開支申報被捕;王現時因初選案被還押。

相關字詞﹕移民 吳志森 曾志豪

上 / 下一篇新聞