港聞

港聞二

【Emily】梁美芬:世侄女OCamp嚇親 回家兩星期唔出聲

【明報專訊】經民聯議員梁美芬早前成立「凝聚民心」平台,成員來自教育、商界、藝術界等多個界別,除咗同成員搞壁畫創作,噚日喺facebook分享平台拍攝嘅短片,請學者分析點解香港社會嘅道德價值觀「瀕臨崩潰邊緣」,希望喚起社會嘅關注,重建番以往熟悉嘅香港。

梁美芬同Emily講,觀察到青年嘅道德觀有下滑迹象,例如早年大學O Camp玩猥瑣遊戲,話有世侄女嚇親,去完O Camp返屋企唔出聲兩星期。美芬話自己唔係保守到唔講得性,但唔係要濫交、將性變成遊戲,話會令有傳統價值觀嘅人唔適應。至於「凝聚民心」仲會有咩搞作,美芬話聽日會開記者會就《施政報告》發表意見。

講番條短片,美芬請嚟時事評論員梁燕城主講,梁燕城話中國有一段被西方國家欺凌嘅歷史,製造出「文化性」嘅傷痕,認為需要用愛去醫治,先至可以推動中國嘅體制變得更合理、更有理性、更有人性,雖然唔會一蹴而就,但強調用愛改進,遠比用仇恨咒駡來得美好。

相關字詞﹕國民身份認同 社會撕裂 梁美芬

上 / 下一篇新聞