港聞

港聞二

【Emily】宣誓會堂猛滴水 徐英偉:水為財

【明報專訊】港島區嘅區議員噚日朝早到北角社區會堂宣誓,由民政事務局長徐英偉負責監誓。呢個社區會堂運作咗大約兩年,裝修都算新淨,但噚日明明陽光普照,地下嗰層有一處天花就不停滴水,撻地濕晒,滴水位置喺正「咪兜」、即徐英偉見記者位置嘅後面,有記者講笑話係咪去咗「水舞間」。徐英偉出場見記者時都望咗望天花,笑住講咗句「水為財」。

噚日宣誓儀式結束後,工作人員放好咪兜,大家等緊徐英偉出嚟發言。不過一處天花不斷滴水,工作人員拖極地都係濕,最後拎桶裝水。Emily聽到有負責人解釋話應該係室內開冷氣,而室外太熱,導致天花滴水。

北角社區會堂喺2019年9月投入服務,社區會堂由民政事務總署管理,唔知作為局長嘅徐英偉眼見滴水問題有咩感想?Emily向民政事務總署查詢滴水原因,署方回覆話東區民政事務處已即時聯絡承辦商到場檢查跟進。

相關字詞﹕徐英偉 宣誓 北角社區會堂

上 / 下一篇新聞