港聞

港聞二

【Emily】鍾國斌駁「控煙助長壽」論:鄧小平煙不離手到90幾歲

【明報專訊】港大研究團隊早前發表報告,話發現香港之所以多次蟬聯全球最長壽地區,關鍵之一在於吸煙相關疾病嘅死亡率低,認為港人長壽係同控煙政策有關。不過自由黨嘅議員唔buy呢個報告。噚日立法會就禁止電子煙、加熱煙嘅修例召開法案委員會,該黨幾個議員輪流發炮,黨魁鍾國斌就話已故國家領導人鄧小平「煙不離手」,到90幾歲先至逝世,反問如果話港人因為控煙措施好而長壽,「不如禁埋傳統煙,港人平均壽命可能去到90幾歲都唔定」。

邵家輝:日本吸煙率高港逾倍

張宇人暗批港大專家「謬論」

自由黨邵家輝就話,日本人都係非常長壽,但佢哋吸煙率比香港高一倍有多,港府堅持要禁嘅加熱煙,日本亦容許出售,認為有關講法站唔住腳。

自由黨主席張宇人都批評「專家謬論」,話唔同意港人食煙少就長命,又質疑好多機構都評估加熱煙禍害較傳統煙低,「我哋竟然都合埋眼,話加熱煙(禍害)比傳統煙高」。佢又自嘲自己讀唔到醫,「可能話我食唔到嘅葡萄係酸嘅,酸酸哋都唔怕,我講嘅嘢係負責任」,仲話「𠵱家見到啲醫生都好驚」。

相關字詞﹕加熱煙 法案委員會 自由黨

上 / 下一篇新聞