港聞

港聞二

【Emily】九龍城區會翻盤 建制重奪正副主席

【明報專訊】建制派再重奪區議會正、副主席,今次輪到九龍城區。九龍城區議會正副主席原本係民主派蕭亮聲同鄺葆賢,但因兩人辭職而出缺,區議員辭職潮令建制派喺九龍城區人數佔多。噚日補選,建制派楊永杰擊敗民主黨郭天立當選主席;自由黨何顯明就喺冇競爭下自動當選副主席。

楊永杰:將拜訪政府部門

楊永杰當選後話,過去議會「泛政治化」,佢上任後會帶領區議會處理民生議題,拜訪唔同政府部門及地區組織重建關係,包括警隊;亦有議員提出修訂調整委員會組成數目。

郭天立(圖)補選前喺facebook話,縱使冇勝算,都會堅持到最後;又話宣誓在即,一直緊守崗位、克盡職守,以服務社區為己任,從未違背參選時簽署嘅確認書,會堅決宣誓。

郭天立:冇勝算都堅持到最後

另外,剩番4名區議員嘅南區區議會噚日原本有大會,議程包括補選民主黨羅健熙辭職而出缺嘅主席之位;但由於區議員彭卓棋早前因民主派初選案被控違反《港區國安法》,保釋條件係唔能夠參與任何選舉,而選舉主席要有3個唔同議員提名同和議,欠彭卓棋一人無法進行。

南區區議會副主席、民主派司馬文有意擔任主席,但佢話民政處唔同意佢以副主席身分主持大會,令區議會工作受到影響。

相關字詞﹕楊永杰 司馬文 南區區議會 建制派 九龍城區議會

上 / 下一篇新聞