港聞

港聞二

【Emily】小張可森出世 鄒家成:知你定可接仔仔放學

【明報專訊】屯門前區議員張可森(Sam,圖)因為民主派立選初選案於今年3月被還押,至今逾半年,張太即使懷孕亦不時到庭旁聽。近日張太平安誕下BB,並喺轉載Sam文章嘅facebook專頁「我地張家」貼出BB相片,見到BB用小手捉住佢隻手指,帖文話「介紹返,我地張家新成員初來報到,多多指教」。

消息一出,唔少人都紛紛轉載、戥阿Sam開心。同樣曾因參與民主派初選被還押、早前獲准保釋嘅鄒家成就話,諗起佢哋喺獄中為Sam嘅仔仔改名,BB轉眼就出世喇,「我知道你一定可以接仔仔幼稚園放學!」BB最近出世,所以應該係處女座,鄒家成仲話要送上林家謙新歌《難道喜歡處女座》畀阿Sam𠻹。

唔少政圈友人留言送上祝福,元朗前區議員李俊威就祝願佢哋一家人平平安安、BB快高長大、媽媽早日復元,同埋一家團聚。

本身係填詞人、熱愛文學嘅Sam,曾經以「缺席通知」為題,向妻兒發家書,內容係「抱歉以這種方式/通知/你關於我的缺席/也抱歉過早讓你知道/世界竟存在無可奈何的不可抗」。

上 / 下一篇新聞