港聞

港聞二

【Emily】李予信辭區議員 做寵物美容「依然喺度」

【明報專訊】涉及民主派初選案、正在保釋嘅李予信噚日宣布辭任東區區議員,區議會網頁顯示,佢嘅任期去到8月31日。阿信噚日喺facebook交代去向,話將會喺一間寵物美容店工作,同時保留以往嘅聯絡方法,持續關注區內跟進緊嘅個案同地區議題,話即使如今角色有變,佢依然喺度,「我與大家一直共同堅守的信念,定能牽引我們走在對的路上。讓我們一如既往,柔韌如水」。

阿信嘅區議會選舉對手、民建聯洪志傑早前提出選舉呈請,要求法庭裁定阿信非妥為當選,法庭前日裁定阿信妥為當選,點知官司結束後翌日(9月1日),阿信就宣布辭職。佢話面對動盪嘅局勢、各種不明處境等,「我決定選擇以另一種形式,繼續與北角社區同行,希望大家能諒解」。

施德來回到起點 社工身分關注劏房

另一初選案被告施德來早前辭任黃大仙區議員,佢噚日發文談前路,話自己回到起點,以社工身分繼續關注貧窮議題,決定喺舊區從事服務基層家庭嘅工作,特別係關注舊區劏房居住問題。工作需要,施德來話𠵱家每星期都行幾十層唐樓樓梯,形容係一個新開始,亦係一個磨練,「我感恩有機會這樣由初心開始,重新出發」。

相關字詞﹕區議員辭職 施德來 李予信 民主派初選案

上 / 下一篇新聞