港聞

港聞二

【Emily】建制主導 北區區會通過不信任主席

【明報專訊】區議員宣誓一直只聞樓梯響,多名民主派區議員早前已辭職,令多區都要重選正、副主席。本身為北區區議會副主席嘅陳旭明早前辭職,噚日區議會大會要重選副主席,結果喺建制派主導下,選出鄉事派、當然議員李冠洪為副主席,並通過對主席羅庭德嘅不信任動議。

鄉事派李冠洪當選副主席

Emily搵過羅庭德,問佢點回應不信任動議、會否辭職,羅庭德回覆查詢時表示,做主席期間自問一直不偏不倚,按常規處理各方問題,「無論任何情况,我都會在現時崗位繼續服務」;又強調一直致力善用區議會平台,跟進區內基建工程、規劃發展工作,「我相信我這1年多的工作,對得住自己,對得住投票予我的選民,對得住香港人」。

被問到預計日後同新任副主席合作會唔會有困難、多名民主派辭職後地區工作會唔會難行,羅庭德就話,喺議會工作上一直以事論事,以往區議會會議有紀錄,「未來會一以貫之處理各項社區事務,繼續為廣大北區居民服務」。

北區區議會原有22席,其中11名民主派先後辭職,目前得番羅庭德、黃凱盈、周錦豪同張浚偉4人為民主派區議員。

上 / 下一篇新聞