港聞

港聞二

【Emily】曾俊華「炸雞上校look」睇君如新戲

【明報專訊】電影《媽媽的神奇小子》改編自殘奧徑賽金牌得主蘇樺偉同媽媽「蘇媽」嘅熱血溫馨故事,前財政司長曾俊華(薯片叔叔)上周六同屋企人入戲院捧場,佢喺facebook話套戲非常感人,充滿正能量,亦帶出香港人勤奮、忍耐、堅持、勇於奮鬥嘅精神,「喺今日大家情緒低落嘅時候,為我哋帶嚟一份令人感到鼓舞嘅心情」,佢相信大家都會喜歡呢齣戲。

讚《媽媽的神奇小子》顯港人精神

佢睇完戲遇上驚喜彩蛋,就係飾演「蘇媽」兼電影監製嘅吳君如,同導演尹志文突然出現,講述佢哋對電影嘅感受,吳君如另一半、導演陳可辛都在場。曾俊華上載咗同吳君如、陳可辛嘅合照,見佢成頭白髮,兩鬢至下巴留晒白鬚,以往佢被指似「薯片叔叔」,如今就有網友話佢似「聖誕老人」或「炸雞上校」。

實政圓桌議員田北辰同日亦帶兩個孫女支持扶康會舉辦嘅《媽媽的神奇小子》慈善場。佢之後同觀眾分享觀後感,話最感動係除咗蘇樺偉自己嘅刻苦努力,更關鍵係佢有個神奇媽媽,一直唔放棄,一步步陪住佢奮鬥;但「最心噏」係神奇小子退役,政府津貼、待遇難以維生,田北辰促政府盡快檢討,令運動員無後顧之憂。

相關字詞﹕殘奧 田北辰 吳君如 蘇樺偉 曾俊華

上 / 下一篇新聞