港聞

港聞二

【Emily】修例遏起底 梁美芬建議喺連登宣傳

【明報專訊】立法會噚日完成審議針對「起底」嘅《2021年個人資料(私隱)(修訂)條例草案》,經民聯梁美芬喺法案委員會話,臨近開學日子,處理好多起底個案同學校有關,她問到草案會唔會處理到好似校友會、師兄弟群組嘅起底問題,政制及內地事務局長曾國衞話要視乎情况,如果構成起底罪行,又發覺搵得到有能力移除有關信息嘅人,當局照樣會送達「停止披露通知」要求披露者移除信息。

梁美芬仲話,希望條例通過後,政府可以通知大學、中學等加強宣傳,亦建議喺電視台購買黃金時段宣傳,甚至喺網上討論區「連登」發放有關資料,認為政府要高調啲,喺唔同社交平台畀用家知道起底有法律責任。曾國衞回應時無直接話會考慮梁美芬嘅意見,只係話明白,而通過修例後會多方面宣傳,令各界知道有關嘅刑事責任。

相關字詞﹕梁美芬 起底

上 / 下一篇新聞