港聞

港聞二

【Emily】獄中學結他 陳皓桓誓做「王子」

【明報專訊】社民連陳皓桓(Figo)早前因承認組織、參與和煽惑他人參與未經批准集結等罪,判囚18個月,佢表現樂觀,透過社交媒體專頁話「有件好重要嘅事宣布」,原來佢把握獄中時間,開始學結他。佢話自己學咗5個chord(和弦),又話其實好怕痛,手指唔可以彈好耐,但為咗要做結他王子,會盡力學習,希望快啲彈到幾首歌。

Figo又提到入獄後身體好咗,因為以前鍾意飲酒,𠵱家就不停飲水,仲用凍水冲涼,皮膚好咗,加上早睡早起,多做運動,成個人好似唔夠18歲咁。

朱凱廸:穿短袖上庭為顯肥

另外,因初選案還押嘅朱凱廸日前回信畀筆友,感謝去法庭旁聽及送車嘅市民,話無論喺法庭時心情幾壞,佢都會抖擻精神,珍惜短暫跟公眾見面嘅機會,會盡可能請求上庭前剪髮,而為咗證明自己長胖,會刻意只穿短袖T恤,等大家安心。佢話每次聽到市民送車叫喊,佢喺囚車裏面都會眼淚直流,唔係因為悲傷自憐,而係感動,話因市民支持,提醒佢喺監獄要過得好。

相關字詞﹕民主派初選案 港區國安法 朱凱廸 陳皓桓

上 / 下一篇新聞