港聞

港聞二

【Emily】前區議員曾振興離港 稱未儲夠簽證費

【明報專訊】多名民主派區議員上月辭職,唔少人其後都離開香港。屯門區前區議員曾振興前晚喺facebook出post,透露自己已經離開一個月,現時身處嘅地方同香港有「八小時的時差,接近五百條屯門公路的距離」,自言離港時係趕忙帶住三數萬現金,現時一家情况安好,但財政壓力巨大,未儲夠簽證費用,又未有穩定收入,自言會努力搵工。佢同時喺帖文附上Patreon連結,收費由最低3英鎊(32港元)到最高嘅200英鎊(2120港元)不等。

稱曾收「不如當去旅行」警告

曾振興噚日以「道歉啟示(事)」為題出post,透露已經唔喺香港。佢提及政府7月開始吹區議員宣誓嘅「DQ風」,唔少親友都擔心佢破產,話破產會搞到家人,所以佢最終都辭職,但其後由多於一個渠道收到警告,甚至有人直接對佢表示「都辛苦左(咗)咁耐,不如當放個假陪老婆仔女去個旅行啦」,幾日後佢就作出離港嘅決定。

匆忙離港 只帶三幾萬現金

育有3名子女嘅曾振興離港前安排咗兩個小朋友申請護照,佢自己就先帶同三數萬現金,同大女一齊離港。

佢慨嘆早前等待同妻兒團聚嘅時刻令佢飽受煎熬,現時一家情况安好,佢自言會繼續努力搵工,希望呢半年可以站穩腳跟,有能力喺嗰邊幫助遇到嘅人。

相關字詞﹕區議員宣誓 區議員

上 / 下一篇新聞