港聞

港聞二

【Emily】李志宏「挺身而出」當選沙田區會主席

【明報專訊】傳出不符宣誓資格嘅區議員會被追薪津後,近日大批民主派區議員辭職,包括多名區議會主席。民主黨「老鴿」程張迎早前辭去沙田區議會主席一職,沙田區議會截至噚日餘下21名區議員,民主派仍佔多數,噚日區議會大會先補選主席,由禾輋邨區議員、無黨派嘅民主派李志宏喺冇競爭下自動當選,黃浩鋒、麥潤培、黃學禮等民主派事後向佢祝賀。黃浩鋒話,李志宏喺呢個時候「挺身而出實屬難得」。

稱不考慮政府DQ 願承擔更大壓力

李志宏同Emily講,好多人問佢會否擔心主席位做唔長,佢話係睇政府決定會唔會DQ佢,佢做自己嘅決定,就係承唔承受到更多風險、壓力。佢直認壓力多咗,因區議會主席負責主持會議、決定議程,政府可能以佢主持會議為由,將議員或議會所講嘅事都入佢數,有一定風險。

被問到會否宣誓,佢話唔知道宣誓內容係點樣,𠵱家答唔到,收信之後再算。

對於幾時發信、追薪起點等,政府風聲屢變,李志宏話佢唔會主動向民政專員查詢,但如果有議員想知,佢會代問。

相關字詞﹕區議員宣誓 區議員辭職 李志宏 沙田區議會

上 / 下一篇新聞