港聞

港聞二

【Emily】梁凱晴出獄後親拆報告板「有始有終」 保釋一個月 鄒家成:仍適應牆外生活

【明報專訊】觀塘區前議員梁凱晴早前因為六四案件被判囚4個月,佢周二刑滿出獄後,就收到通知要將月華選區內嘅社區報告板移除。喺獄中剪短頭髮嘅凱晴噚日攞工具落區,同義工一齊親手卸下區內3塊報告板,「有始有終」。

而民主派初選案被告之一鄒家成(Owen)唔經唔覺已保釋一個月,佢噚日喺facebook發文,話保釋後用咗一個星期重新適應牆外環境同生活,舉例保釋翌日到餐廳食早餐,雖然客人唔多,但覺得好「吵鬧」,好想逃離,「凝視餐單卻不知如何選擇,瞥見他人使用『安心出行』頓時感到自己身在異空,世界無時無刻宛如剩下自身任意飄浮,不禁熱淚盈眶」。

鄒:活在當下 準備入獄

Owen又話,保釋後當局冇發還身分證、八達通等畀佢,懲教、警方都話唔知喺邊。過去呢個月,Owen曾被警方截查,但當時只有保釋紙同身分證影印本喺身上。佢話目前時刻提醒自己「活在當下」,把握時間陪家人、準備下次入獄,雖然近日較少發表言論,但自己「從來沒有離開過香港的民主運動,依舊深繫彼此」。

上 / 下一篇新聞