港聞

港聞二

【Emily】河南水災 建制派捐款好爽手 工聯會30萬 人大代表夾100萬

【明報專訊】河南省多地連日暴雨,省會鄭州嚴重內澇,多人死傷,百萬人受災。建制派喺網上一片祝福之聲,有政黨仲發起籌款甚至直接捐款。工聯會喺facebook祈願「河南同胞平安度汛」,更從「香港工會聯合會救災慈善基金」緊急撥出30萬港元,為河南救災獻出力量。工聯會會長吳秋北、理事長黃國噚日將捐款支票交畀中聯辦,由中聯辦副主任何靖接收,將轉交河南省總工會。工記之後會發動內部募捐,呼籲屬會同會友支持,亦希望全港市民展現與內地同胞守望相助、血濃於水嘅精神。

港區人大代表亦去信河南省人大常委會,對遇難同胞表示沉痛哀悼,慰問死者親屬及傷者,又向救援人員表示崇高敬意。佢哋又集體捐款100萬港元賑災。

紫荊黨民建聯同發起募捐

紫荊黨亦向200幾個黨員、黨友發出募捐號召,截至前晚籌得10萬港元,善款將立即投入救災活動,部分款項用於採購救災物資,捐贈當地民政部門或慈善機構。紫荊黨又話設立咗紫荊黨河南防汛救災特別行動小組,特別為災區嘅港人提供協助。

民建聯亦發起籌款,賑濟河南災民,市民可將捐款存入該黨嘅賑災專戶,民記話籌募得嘅善款將經由中聯辦轉交河南省相關部門。

另外,唔少建制派個人向中國人口福利基金會嘅「援馳河南我們在行動」捐款,好似經民聯梁文廣就捐咗500蚊。

相關字詞﹕紫荊黨 經民聯 工聯會 民建聯 河南暴雨

上 / 下一篇新聞