港聞

港聞二

【Emily】為睇MIRROR 街坊叫前議員幫手排隊

【明報專訊】ViuTV男團MIRROR、ERROR人氣爆燈,有傳佢哋聽日(周五)會現身屯門市廣場為東京奧運造勢。屯門前區議員、民主黨盧俊宇(Cary)就上載咗WhatsApp信息截圖上facebook,顯示有自稱住美樂花園嘅街坊同佢講,自己同老公都好鍾意MIRROR嘅姜濤同盧瀚霆(Anson Lo),問佢辦事處會唔會提供協助,例如幫手排隊,「因為我地(哋)都要返工,擔心回到屯門市廣場已太遲,所以如果盧議員辦事處可以幫手排隊攞位就好了」。

盧俊宇:已封鎖 真心瘋狂

Cary其後再上載截圖,顯示該街坊話有投票畀佢、鬧佢唔覆街坊求助係太不負責任;Cary就話自己已「封鎖」該街坊,話該人「真心瘋狂」。查實Cary早前已辭去區議員,佢話都想有人幫佢排隊睇,仲「利申」自己都係MIRROR粉絲。

帖文一出即刻引起網上熱議,已辭去油尖旺區議員嘅李傲然憶述,在任區議員期間經常聽到人講「阿議員,我有投票俾你㗎」,佢相信呢句說話對現職、已退役嘅區議員都有好深感受,尤其去年初要派口罩時,總有議員嘆呢句說話係「催命的咒符」、「情緒勒索的新咒語」。

相關字詞﹕姜濤 區議員

上 / 下一篇新聞